مختصر تعارفی سلسلہ سرائیکی ادبی شخصیات 4 (سید بابر اقبال بابر )۔ جہانگیر سوز

مختصر تعارفی سلسلہ
نام– سید بابر اقبال بابر

تخلص— اقبال بابر

سکونت— کوتانی تحصیل تونسہ شریف ضلع ڈیرہ غازی خان

تصنیف— (مجموعہ کلام زیراشاعت اے عنقریب منظر عام تے آونڑ آلے)

مرشد دا وڈا تعارف نسبت سادات اے۔
مرشد کھیر کھنڈ ،تے ہنس مکھ مزاج دے مالک ھن۔
1990 دی دہائی توں ثقافتی تے سماجی میلہ پیر گھوکن شاہ کوتانی دی میزبانی دا سہرا مرشد دے نانویں ھے۔
اپنڑیں وسیب وسدیں کوں تفریح فراہم کریندے رہ ویندن۔
میڈے سمیت ایں وسیب واسیں کوں سرائیکی زبان دے نامور شعراء کوں ڈیکھنڑ تے سنڑنڑ دا موقع ملے۔

دمان سرائیکی ادبی سنگت کوتانی دے صدر ھن۔

منتخب کلام شاعر
نظم.
خاص جنم.
ساہ سلوک دا سیبہ کائنا
ساکھ وی ستھری کائنئ ساڈی
وت ہک خاص جنم دے کیتے
اپنڑے آپ کوں پوریے سے چا
ہجر دے اِکوی ڈیہنہ دا پردہ
چّنج دے نال ٹھنگوریے سے چا
… ……….
ڈینہہ ڈراکل ہے جِتھاں شام نمانڑی لِکھاں
زندگی کیویں فقیریں کوں سبانڑی لِکھاں

اوں تاں مٹی اُتیں مٹی کو چا مٹی لکھیے
کیویں پانڑی اُتیں پانڑی کوں میں پانڑی لِکھاں

اَج وی کفنی کیتے قدوں کوں کچھیندن لوکی
آپ کوں آپنڑی میّت تے مکانڑی لِکھاں

کیرھے انداز دیوچ آ کنیں مِلسیں میکوں
ریت نویں یا کوئ رسم پرانڑی لِکھاں

مَسیں مَسیں تیڈے خوابیں توں نکل آیا ہاں
ہُنڑ تیڈے یادیں کوں دل آہدے بِلانڑی لَکھاں

ہِن میڈے وال میڈے حال دے شاہد بابر
نال پپلیں دے تیڈی خاک ہے چھانڑی لِکھاں

………..
دِل وِچ ہِک حسرت نئیں ہوندی جنگل ہوندے
جنگل دے وِچ ہِک ہِک رستہ دلدل ہوندے

کیا تھی گئے جے وقت رکاوٹ آن بنڑیا ہے
کیا تھی گئے جے اکھیاں کولوں اوجھل ہوندے

جیندے پہلو دیوچ گُزریے پل پل ساڈا
اوندے نکھڑنڑ دا ارمان وی پل پل ہوندے

ول ہووے ہا قسمت دیوچ ول نہ آندا
ہُنڑ میں ہوندا اوندی زلف دا کُنڈل ہوندے

کیکوں فُرصت ہے جو گالہیں پیار دیاں چھیڑے
چھیڑے وی تاں میں وانگوں کُئی پاگل ہوندے

سورج کون ہے ٹُردا شام کوں تیڈے رَلے
میڈے رَلے شام کوں ہاں دی پونبل ہوندے

سنگھڑ دیوچ ریت دیاں چساں ڈوڑیاں ہوندن
جَیں جَیں ویلے سمی دے سنگ راول ہوندے

کجھ ڈیہنہ کولوں بابر وستی وچ نئیں ڈِسدا
وَل کہیں آکھیے شہر وچالے اجکل ہوندے
………

دُعا کرو کامیاب تھیوے ایں سلسلے وِچ
میڈی محبت دی راہبہ ہے مُراقبے وِچ

اے لمحہ لمحہ میکوں پتہ ہے جو قیمتی ہے
جیرھا گزردا ہے جانیاں تیڈی بھال دے وِچ

اگیں وی بدنام ہے اُبالھے قدم اُٹھا کے
جو سوچ میڈی کوں راہونڑا پوسی حوصلے وِچ

تیڈے میڈے درمیاں بظاہر بیا تاں کوئی نئیں
جو فاصلہ ہے تاں مصلحت ہوسی فاصلے وِچ

اے دل کوں وہم اے جو آپ باہرو نہ آ وجے او
مِلوں جو اوکوں کتھائیں اساں اوندے دائرے وِچ

ڈِسنڑ دیوچ تاں اے شیخ لگدا ہے گھیو دا گھڑا
او خود پرست اے مگر اَنا دے معاملے وِچ

توڑے جو بابر میں خیر منگدا veryہاں سوجھلے دی
وَلا وی اکثر لُٹیج ویندا ہاں سوجھلے وِچ
………..
کیوں نئیں آیا اے تعبیریں وچو نئیں
قاصد یار وی خاص مُشیریں وچو نئیں

اوندے بارے حاسد موتی آہدے ہِن
موتی ہے پر موتی ہیریں وچو نئیں

بھاگ وندی کَن پہلے گالہیں بیاں ہَن
کون آہدے جو کوڑ کسیریں وچو نئیں

کہیں جو آکھِیس اوندے نیر دیاں نہراں ہِن
آہدے نہراں تیز وہیریں وچو نئیں

مِل پووے تاں پیار دے نال الایا چا
زُلف دا قیدی عام اسیریں وچو نئیں

میڈے بارے لوکی آہدے ہِن بابر
سید ہے پر پیر فقیریں وچو نئیں

اقبال بابر

مختصر تعارفی سلسلہ

سرائیکی وسیب دے نامور تے  گمنام ، نویں تے پرانڑے لکھاریاں دے تعارف دا ہک سلسلہ ہے جہیڑا جہانگیر سوز سائیں نے شروع کیتے ۔

شعراء دے کلام دے نال انہاں دا تعارف تے اکٹھا کرنا ہن وݙا کم ہای ۔  جہیڑا جہانگیر سوز سر انجام ݙتے۔ کتاب سرائکی ڈاٹ کام تے ایہ  سلسلہ مستقل شائع تھیسی۔

سرائیکی شعراء کا تعارف ، سرائیکی ادیبوں کا تعارف ، تعارفی سلسلہ مکمل قسطاں پڑھن کیتے اتھاں لنک اوپن کرو۔

 

http://www.kitaabsaraiki.com/categories/intro

جہانگیر سوز

جہانگیر سوز

جہانگیرسوز سائیں تونسہ شریف دے رہائشی،شاعرتے مشہور ادبی شخصیت ہن۔ انہاں دا اہم سلسلہ سرائیکی ادبی شخصیات دے تعارف ساݙی ویب سائیٹ تے قسط وار شائع تھیندا پے۔ پروفائل اوپن کر کہ پڑھو

ایکوں شئیر کرن کیتے تلویں بٹن دباو

Share on facebook
فیس بک
Share on twitter
ٹوئیٹر
Share on whatsapp
واٹس ایپ
Share on email
ای میل
Share on pinterest
پن ٹریسٹ
Share on google
گوگل
Share on telegram
ٹیلی گرام
Share on print
پرنٹ کرو
error: Content is protected !!