نویاں کتاباں پڑھو

مہینہ وار تحریراں

سب تو زیادہ پڑھی ڳئ

اپنڑی ، دکان ، کاروبار ،سکول ، کالج ، آنلاین کاروبار ، یا کہیں وی قسم دے اشتہارات کیتے ساکوں ای میل کرو یا فیس بک تے میسج کرو۔ تلے آلا بٹن دباو

سیرت النبی صلی اللہ علیہ وسلم ۔ قسط 2 لکھت ملک محمد رمضان آرائیں

یہ تحریر مختلف زبانوں میں پڑھیں۔

۞ سِیرت النبیﷺ ۞
ݙوجھی قسط
پورھیا لکھت==م م رمضان ارائیں==
تَریخ:٠٤ــ٠١ــ٢٠٢١ء وار، سوموار
گذریل قسط ءچ حضرت ابراھیم علیہ السّلام دےلختِ جگرحضرت اسمائیل علیہ السّلام تےزم زم دےکُھوہ دا حال حویلہ ہا. اے زم زم دا کُھوہ حیاتی واسطےوݙی خوشی وان٘گوں ہا. پہلےقبیلہ جرھم جیرھا پاݨی دی ڳول سانگے عرب دےروہ جبل، تَھل وچ پِھردا ریہا تےزم زم دےنیڑےآباد آن تھیا. اینویں تھوڑےویلھےبعد ہک ٻیا قبیلہ بنی قطورا وی بی بی حضرت حاجرہ علیہ السّلام دی اجازت نال اُتھاں آن وَسیا.
اتے مکّہ دا پُراݨا تے اصل ناں بَکّہ ہا(سورہ آل عمران)..مَکّے ہک چنڳی بَھلّی وَسوں دی شکل گھن گِھدی ـــــ
آوݨ والے ١٥، ٢٠ سال ءچ کجھ واقعات ظاہرتھئے. اُوندےءچوں ہِک حضرت ابراھیم علیہ السّلام دا او خواب جیندے ءِچ اُنہاں کُوں اپݨےپُتردی قربانی دا رب رحیم تُوں حکم مِلیا، پَکّی ڳالھ اے حضرت ابراہیم علیہ السّلام تےحضرت اسمائیل علیہ السّلام تےآزمائش ہَئی..
حضرت ابراہیم علیہ السّلام اللّہ پاک دےحکم نال مکہ پُڄےتےاپݨےپُترحضرت اسمائیل علیہ السّلام کُوں اپݨا خواب سُݨایا، بھاڳ بھریےپُتر اے آکھ تےراضی تھی ڳیا،جو حکم رب دا تےمیکوں منظور ہےمیں رب دی رضا تےراضی ہاں،قربانی دےعین اُوں ویلھےجیلھےحضرت ابراہیم علیہ السّلام اپݨےپُترحضرت اسمائیل علیہ السّلام دی ڳچّی تےکاتی چلاوݨ والےہن، کریم رب نےایں امتحان ءچ پاس تھیوݨ پاروں حضرت جبرائیل علیہ السّلام کُوں ہِک دُن٘بے سمیت بُھوئیں تےوَن٘ڄݨ دا حکم ݙِتا تےحضرت اسمائیل علیہ السّلام دےبدلےدُن٘بہ قربان تھیا..
رحیم رب کُوں حضرت ابراھیم علیہ السّلام تےحضرت اسمائیل علیہ السّلام دا اے کم ٻہوں پسن٘دآیا تاں وَل اللّہ پاک نےقیامت تک ایں وَݙی قربانی دی یاد ءِچ حج دےݙینہ قربانی فرض کرݙتی. ہُݨ اےہرسال سنت ابراہیمی جاری ہے تےعیدالاضحیٰ دےݙینہ لَکھاں کروڑاں مسلمان اللّہ دی راہ تےزناور کُہین٘دِن تےایں وَݙی قربانی دی یاد مَنیدِن..
ݙوجھا وَاقعہ خانہ کعبہ دے نَویں سِروں بݨاوݨ دا تھیا. خانہ کعبہ حضرت آدم علیہ السّلام پہلوں بݨایا ہا، بُھوئیں تے اےاللّہ پاک دا پہلا گھر ہا وقت گزرݨ نال نال اےگھر بھوئیں توں مِٹیج ڳیاتےحضرت ابراھیم علیہ السّلام دےویلھےاین٘دا کئی ناں نشان نہ ہا.. وَل اللّہ پاک دےحکم نال حضرت جبرائیل علیہ السّلام نےحضرت ابراھیم علیہ السّلام کُوں خانہ کعبہ دےاَیرےٻَدھݨ دے نشان ݙتے. آپ اپݨےپُترحضرت اسمائیل علیہ السّلام نال مِل کراہیں خانہ کعبہ کوُں پُراݨی جاہ تےبݨایا، اللّہ پاک دا اے گھر اِتنا سادہ جین٘دی نہ چَھت، نہ کئی دَر… کعبہ کُوں “کعبہ”اُون٘دی شکل وشبہ مکعب وان٘گوں ہووݨ دی وجہ کَنوں آکھیا وین٘دا ہا، عربی ءِچ چھ ہِکوجیہاں پہلوؤں والی شئےکُوں معکب اَہدِن.حضرت ابراھیم علیہ السّلام نے اینکوں مکعب وان٘گوں بݨایا ہا تےایں ڳالھوں این٘دا ناں کعبہ اکھیجݨ پہ ڳیا، یاد رکھݨ دی ڳالھ اے ہے، ہُݨ والا خانہ کعبہ چار چُنڈاں والا ہےجینکوں قریش مکّہ اُوں ویلھےبݨایا ہا جیں ویلھےہِک سیلاب نال کعبہ شریف دا در تے دیواراں ڈھہ ڳئیاں ہَن. ایں ڳالھ دا ذکر اڳوں کریسوں..
تَریجھا وَݙا واقعہ قبیلہ جرھم تے بنی قطورا دا ہے.حضرت ابراہیم علیہ السّلام دی تبلیغ نال ݙوہیں قبائل دین ابراہیمی قبول کیتا، جیندےبعد حضرت ابراھیم علیہ السّلام خانہ کعبہ تےٻئےمذہبی انتظام قبیلہ جرھم دے حوالےکرݙتے، این٘دےبعد ہِیں قبیلہ جرھم دے سردار دی دھی نال حضرت اسمائیل علیہ السّلام دی شادی تَھئی.. کجھ پیڑھیاں گُزرݨ نال اولاد اسمائیل علیہ السّلام وَدھی پَھلی تاں وَلا خانہ کعبہ دا سارا انتظام سَن٘بھالیا، ویلھےگُزرݨ نال ٻیا ہِک قبیلہ آیا”ایاد”مَکّےتے حملہ کیتا تےشاہر اُتے قبضہ کرگِھدا.. ایں دوران بنی اسمائیل‌ دےٻہوں سارےقبائل کُوں مکّہ کنوں نکلݨا پیا.وَل بعد ءِچ یمن کولوں آوݨ والا ہک ٻیا قبیلہ بنو خزاعہ نےمکّہ کُوں بنی ایاد کَنوں آزاد کرایا..
حضرت اسمائیل علیہ السّلام دی اولاد کَنوں “قصی بن کلاب”وَݙےناں والےبزرگ تھی گزرین جین٘دی شادی بنو خزاعہ دےرئیس دی دھی نال تَھئی، جئیں خانہ کعبہ دی متولیت واپسی گھنݨ سانگے دوڑ دھوپ کیتی آخرکار ایں مقصد ءِچ کامیاب تھی ڳیا. اُوں پُراݨی عمارت تروڑ ݙتی تےخانہ کعبہ کُوں نَویں سِرےکنوں بݨایا تےپہلی واری کَھجیاں دےپَتریں دی چَھت جوڑی..
ایہو ہی قصی بن کلاب باصلاحیت بزرگ ہا جَئیں مَکّہ کُوں ہِک سوہݨا تےبہترین شاہر جوڑیا تےمنظم کیتا، اینکوں چن٘ڳی ریاست مکّہ دا مطلق العنان بادشاہ آکھیا وَن٘ڄ سَڳین٘دے، جیندا ہرلوظ قانون دا درجہ رکھین٘دا ہا،قصی بن کلاب نےݙوجھےقبائل دےاڳواݨیں کُوں صلاح مشورےسانگے اپݨی حکومت ءچ شامل کیتا تےانتظامی کَمیں کاریں کیتےچھ وَکھرےشعبےبݨائے تےعُہدے، او سَبھےاپݨی اولاد ءچ وَنڈا چھوڑے..
ایہو نظام وَݙی کامیابی نال ١٥٠سال کَنوں زائد عرصہ تک چَلدا ریہا….
بعثت نبوی ﷺ دےبعدجݙاں مَکّہ فتح تھیا تےایں نظام کوں اسلامی اصولاں تےبنیاداں ءچ رَلا ݙتا ڳیا……
ــــــــ جاری ہےــــــــ
۞===م م رمضان ارائیں===۞

محمد رمضان ارائیں

محمد رمضان آرائیں سوشل میڈیا تے عرصہ دراز تو سرگرم سرائیکی لکھاری ہن۔ جناب سرائیکی وکی پیڈیا تے ایڈمن وی ہن ۔

ایکوں شئیر کرن کیتے تلویں بٹن دباو

Share on facebook
فیس بک
Share on twitter
ٹوئیٹر
Share on whatsapp
واٹس ایپ
Share on email
ای میل
Share on pinterest
پن ٹریسٹ
Share on google
گوگل
Share on telegram
ٹیلی گرام
Share on print
پرنٹ کرو

ہیندے نال دیاں بیاں لکھتاں ݙیکھو

نویاں کتاباں پڑھو

مہینہ وار تحریراں
Free counters!
error: Content is protected !!